मोटरसाइकलको ठक्करबाट एक जनाको मृत्यु, एक जना घाइते

दाङ :  दाङमा मोटरसाइकलको ठक्करबाट  एक जना पैदलयात्रीको मृत्यु भएको छ, भने एक जना घाइते भएका छन् । मृत्यु हुनेमा घोराही उपमहानगरपालिका १४ लुहासुर बस्ने ५५ वर्षीय नन्दबहादुर घर्ती रहेको जिल्ला प्रहरी कार्यालय दाङले जनाएको छ । शुक्रबार साँझ करिब साढे ७ बजेतिर घोराही १४ नयाँ  बसपार्कमा डुम्मर गाउँबाट मिलनचोक तर्फ जाँदै गरेको लु.प्र.०२००१ प.०७४६ नम्बरको मोटरसाइकलले पैदलयात्री घर्ती र ४५ वर्षीया मनमती नेपालीलाई ठक्कर दिएको थियो ।

मोटरसाइकलको ठक्करबाट घाइते घर्तीलाई राप्ती स्वास्थ्य विज्ञान प्रतिष्ठान घोराही दाङमा डाक्टरले चेकजाँच गर्दा राती करिब सवा ८ बजेतिर मृत घोषणा गरेको जिल्ला प्रहरी कार्यालय दाङका प्रवक्ता एवं डीएसपी ईश्वर थापाले जानकारी दिए । उनका अनुसार घाइते नेपालीको प्रतिष्ठानमा उपचार भइरहेको र उनका अवस्था मध्यम रहेको छ । यस्तै मोटरसाइकल र मोटरसाइकल चालक घोराही १० नारायणपुरका २१ वर्षीय तिलक खड्कालाई प्रहरीले नियन्त्रणमा लिएर थप अनुसन्धान थालेको समेत जनाएको छ ।