दाङ : तुलसीपुर बजारको फुटपाथ खाली गराउन नगर प्रमुख र उपप्रमुख नै सडकमा निस्किएका छन् । उपमहानगरको सार्वजनिक सूचनालाई अटेर गर्दै व्यापारीले सडकपेटी र फुटपाथमै सामान राखेर बेच्न थालेपछी त्यसलाई हटाउन नगर प्रमुख टीकाराम खड्का र उपप्रमुख स्यानी चौधरी दलबल सहित अनुगमनमा हुन् । बजार व्यवस्थापक र प्रहरी सहित गएको नगर प्रमुखको नेतृत्वको अनुगमन टोलीले सडक र फुटपाथमा सामान नराख्न अनुरोध गरेको छ । तर, उपमहानगरको अभियानलाई अटेर गर्नेको सामान नै जफत गरिएको छ । बजारलाई व्यवस्थित र सुन्दर बनाउन सडकपेटी र फुटपाथ खाली गराउने अभियान थालिएको नगर प्रमुख खड्काले बताए ।
‘व्यापारीले सडकपेटी मिचेर सामान राख्दा बजार अस्तव्यस्त भयो ।’ नगर प्रमुख खड्काले भने,‘ व्यापार गर्ने कोठामा हो । सडकपेटीमा होइन । त्यसैले त्यसैले व्यापारीलाई अनुरोध गर्न पसलमै पुगेका हौँ ।’ अबदेखि बजारमा सटर भन्दा बाहिर सामान राख्न नदिइने बजार व्यवस्थापन शाखा प्रमुख रेखा शर्माले जानकारी दिइन ।
बुधबार सचेत गराइएको र फेरी जाँदा सटर भन्दा बाहिर सामान राखेको पाइएमा जफत गरी जरिवाना समेत गरिने उनले बताइन् । सडकपेटीमा सामान राख्नाले यात्रु बिच सडकमा हिडनु पर्ने र त्यसले दुर्घटना निम्त्याउने जोखिमलाई रोक्न पनि यस्तो कदम चालिएको उपप्रमुख चौधरीले जानकारी दिइन् । बजारलाई व्यवस्थित गर्न अनुगमनलाई निरन्तरता दिइने तुलसीपुर उपमहानगरले जनाएको छ ।