दाङमा लाठी प्रहार गरि श्रीमतीको हत्या गर्ने श्रीमान पक्राउ

दाङ :  दाङमा प्रहरीले श्रीमतीको हत्या गर्ने श्रीमानलाई पक्राउ गरेको छ । पक्राउ पर्नेमा लमही नगरपालिका १ स्याले बस्ने श्याम कुमार कुमाल रहेको जिल्ला प्रहरी कार्यालय दाङका प्रवक्ता एवं डीएसपी राम प्रसाद तिमल्सिनाले जानकारी दिए । उनका अनुसार बुधबार बिहान करिब ७ बजेतिर कुमालको घरदेखि करिब १ किलोमिटर पश्चिममा रहेको हात्तीखालबाट स्याले जाने सडकको बिच भागमा ४२ वर्षीया ईश्वरी कुमाल मृत अवस्थामा फेला परेको खबर प्रहरीलाई आएको थियो ।

खबर प्राप्त हुनासाथ इलाका प्रहरी कार्यालय अमिलिया दाङबाट प्रहरी टोली गइ प्रारम्भिक चरणमा बुझ्दा श्रीमानले नै घटना घटाएको हुनसक्ने प्रहरीले अनुमान गरेको थियो । त्यसपछि प्रहरीले श्याम कुमारलाई जलकुण्ड स्थित बाटोमा हिँडिरहेको अवस्थामा फेला पारी बिहान करिब ८ बजेतिर नियन्त्रणमा लिई सोधपुछ गर्दा श्रीमान र श्रीमती दुवै जनाले मादक पदार्थ सेवन गरेको र घर फर्कने क्रममा सामान्य वादविवाद हुँदा काठको लाठी प्रहार गरी हत्या गरेको प्रहरीले जनाएको छ । यस्तै पक्राउ परेका कुमाल माथि दाङ जिल्ला अदालतबाट ७ म्याद थप भई वडा प्रहरी कार्यालय लमही दाङबाट विस्तृत अनुसन्धान कार्य भइरहेको समेत प्रहरीले जनाएको छ ।