शान्तिनगरका प्रमुख प्रशासकीय अधिकृत मल्लको धादिङ सरुवा

दाङ : शान्तिनगर गाउँपालिकाका प्रमुख प्रशासकीय अधिकृत भीष्म कुमार मल्लको धादिङको थाक्रे गाउँपालिकामा सरुवा भएको छ। आइतबार एक कार्यक्रमको आयोजना गरि गाउँपालिकाका कर्मचारीले अधिकृत मल्ललाई बिदाइ गरेका छन्। अधिकृत मल्ल गएको मंसिर १८ गते प्यूठान नगरपालिकाबाट सरुवा भइ शान्तिनगर गाउँपालिकामा प्रमुख प्रशासकीयको जिम्मेवारी सम्हालेका थिए ।

अधिकृत मल्लको शान्तिनगरमा यो दोस्रो कार्यकाल हो। आफू साढे पाँच महिना सम्म शान्तिनगरमा रहँदा सबै कर्मचारी र जनप्रतिनिधिसँग राम्रो व्यवहार भएको बताउँदै अधिकृत मल्लले सरुवा बढुवा कर्मचारीको नियमित प्रक्रिया भएको बताए ।  

नयाँ प्रमुख प्रशासकीय अधिकृत को आउने भन्ने कुरामा अहिलेसम्म कुनै जानकारी नभएको पनि अधिकृत मल्लले बताए ।  डेढ वर्षको अन्तरालमा शान्तिनगर गाउँपालिकामा ३  जना प्रमुख प्रशासकीय अधिकृतको सरुवा भएको छ। मल्लको सरुवा भए पछि गाउँपालिकाको नयाँ प्रमुख प्रशासकीय  अधिकृत नआउँदासम्म निमित्त प्रमुख प्रशासकीयको जिम्मेवारी लेखा भण्डारीले सम्हाल्ने छिन् ।