भोलि बिहान तुलसीपुर रोयल्स र दंगाली लायन्स भिड्दै

 दाङ   :  लुम्बिनी प्रदेशकै ठूलो राशिको फ्रेन्चाइज दाङ क्रिकेट लिगको दोश्रो संस्करणमा सहभागी टिम तुलसीपुर रोयल्सको सम्पूर्ण तयारी पूरा भएको जनाएको छ । तुलसीपुरमा सोमबार पत्रकार सम्मेलनको आयोजना गरेर तयारी पूरा भएको जनाएको हो ।तुलसीपुर रोयल्स टिममा पाँच जना राष्ट्रियस्तरमा खेली सकेका खेलाडी, पाँच जना दाङ सिनियर टिमबाट खेलिसकेका, दुई जना दाङ १९ वर्षमुनिका खेल खेलेका र दुई जना दाङ र बाहिर खेली सकेका खेलाडी गरी १४ जना खेलाडी अनुबन्धित भएको छन् । दिवान पुनको कप्तानीमा रहेको टिमको कोचमा दिपेन्द्र प्रताप सिंह अनुबन्धित भएका छन् ।

कोच दिपेन्द्रले गेमको विजेता हुने गरेर नै आफ्ना खेलाडीलाई प्रशिक्षण दिएको जिकिर गरेका छन् । त्यस्तै कार्यक्रममा टिम म्यानेजर कमल डाँगीले पछिल्लो समय तुलसीपुर क्षेत्र खेलको हवको रुपमा विकास भैरहेको बताएका छन् । मंगलबार  बिहान हुन लागेको तुलसीपुर रोयल्स र दंगाली लायन्सबीचको प्रतियोगितामा आफ्नो टिमले निकै नै आकर्षक  खेल प्रदर्शन गर्ने विश्वास लिएको बताए । साथै उनले तुलसीपुर लगायत दाङवासीलाई तुलसीपुर रोयल्स टिमलाई सर्पोट गर्न समेत आग्रह गरेका छन् ।

उनले खेलाडीको मनोबल बढाइ दिनका लागि स्टेडियममै गएर खेल हेर्न पनि आग्रह गरे । टि – ट्वान्टी लिगका आधार खेल खेलाइने छ । प्रतियोगितामा घोराही टाइगर्स , दंगाली लायन्स, तुलसीपुर रोयल्स, पुरन्धारा च्यालेन्जर्स र देउखुरी वारीयर्स गरी पाँच वटा टिमहरू सहभागी छन् । प्रतियोगिताको सोमवार लुम्बिनी प्रदेशका स्वास्थ्यमन्त्री राजु खनाल र घोराही उपमहानगरपालिकाका नगर प्रमुख नरुलाल चौधरीले उद्घाटन गरेका छन् । लिगको विजेता टिमले नगद दुई लाख ५० हजार र उपविजेताले १ लाख रुपैयाँसहित शिल्ड, ट्रफी र प्रमाणपत्र प्राप्त गर्नेछन् ।

त्यसैगरी लिगमा सबैभन्दा बढी रन बनाउने खेलाडी, बढी विकेट लिने खेलाडी, ईमर्जिङ खेलाडीलाई समान दश र दश हजार, म्यान अफ द सिरिजलाई पन्ध्र हजार, म्यान अफ द म्याचलाई पाँच हजार प्रदान गरिने छ । प्रतियोगिता आगामी फागुन १४ देखि फागुन १९ गतेसम्म घोराही उपमहानगरपालिका १७ गुलरिया रहेको घोराही क्रिकेट मैदानमा जारी छ । प्रतियोगिताको उद्घाटन खेल घोराही टाइगर्स र दंगाली लायन्सका बिच भएको छ । यसैबिच, तुलसीपुर रोयल्सले महेन्द्र माध्यामिक विद्यालय तुलसीपुरमा २५ हजार बराबरको अक्षय कोष स्थापना गर्ने भएको छ । उक्त विद्यालयमा अध्ययनरत जेहेन्दार तथा गरिब विद्यार्थीका लागि अध्यक्ष कोष स्थापना गरिएको टिमका प्रमुख दिनेश पाण्डेले जानकारी दिए ।