शनिबारसम्म वर्षा र हिमपातको सम्भावना

काठमाडौँ  :  पश्चिमी वायुको प्रभावले आगामी शनिबारसम्म देशभर आंशिकदेखि सामान्य बदली रही केही स्थानमा हल्का वर्षा र हिमपात हुने भएको छ । बुधबार रातिदेखि पश्चिम नेपालबाट प्रवेश गरेको पश्चिमी न्यूनचापीय प्रणालीको प्रभावले बिहीबार सुदूरपश्चिम, कर्णाली, लुम्बिनी र गण्डकी प्रदेशमा सामान्यदेखि पूर्ण बदली रहने मौसम पूर्वानुमान महाशाखाले जनाएको छ ।

यस्तै, बागमती, मधेश प्रदेश र प्रदेश १ मा आंशिकदेखि सामान्य बदली रहने छ । उच्च पहाडी तथा हिमाली भू–भागका अधिकांश स्थानमा हल्का हिमपातको सम्भावना रहेको छ ।

शुक्रबार देशैभरी सामान्यदेखि पूर्ण बदली रहने र शनिबार देशभरी आंशिकदेखि सामान्य बदली रहने महाशाखाले जनाएको छ । आज सुदूरपश्चिम, कर्णाली र लुम्बिनी प्रदेशका धेरै स्थान तथा गण्डकी र वागमती प्रदेशका केही स्थानमा मेघ गर्जनसहित वर्षा हुने महाशाखाले बताएको छ । अन्य प्रदेशका पहाडी भूभागका एक दुई स्थानमा हल्का वर्षाको सम्भावना रहेको बताइएको छ ।