काठमाडौं : विपदबाट भएको क्षतिको विवरण तत्काल पठाउन गृह मन्त्रालयले प्रमुख जिल्ला अधिकारीहरूलाई निर्देशन दिएको छ।
बेमौसमी वर्षाका कारण भएको क्षतिको विवरण तत्काल पठाउन मन्त्रालयले बुधवार प्रमुख जिल्ला अधिकारीहरूलाई निर्देशन दिएको हो। गत शनिवार अपराह्नबाट भएको बेमौसमी वर्षाका कारण पश्चिम नेपाल तथा पूर्वी नेपालमा सबै भन्दा बढी क्षति पुर्याएको छ।
गृह मन्त्रालयका प्रवक्ता फणिन्द्रमणि पोखरेलका अनुसार बिहीवार दिउँसोसम्म देशभर बेमौसमी वर्षाका कारण आएको बाढी तथा पहिरोमा परेर ८८ जनाको मृत्यु भएको छ भने ३० जना बेपत्ता छन्।
यसै गरी भित्र्याउने तयारीमा रहेको हजारौँ हेक्टर धान बाली पानीले नष्ट गरेको छ। यस्तै पहिरोका कारण अन्य कृषि बालीमा समेत असर परेको छ। कतिपय स्थानमा धान बाली लगाएको खेत नै बाढीले कटान गरी बगाएको छ।
वर्षाका कारण सुदूरपश्चिमका डोटी, बझाङ, कञ्चनपुर, कैलाली, बैतडी लगायतका जिल्लामा असर पुर्याएको छ भने पूर्वी नेपालका इलाम, पाँचथर, ताप्लेजुङ, मोरङ, सुनसरी लगायतका जिल्लामा समेत असर पुर्याएको छ।
अनलाइन राप्तिको युटुब च्यानल (Online Rapti) सब्सक्राइब गर्नुहोस् । हामी वास्तवीक, जानकारीमूलक र रोचक भिडियोहरु राख्ने गर्छौ ।
प्रतिक्रिया दिनुहोस
