तुलसीपुरमा ९६ प्रतिशत बालकालिकाले दादुरा रुवेला खोप लगाए

विकास डाँगी

तुलसीपुर, यहि फागुन १६ देखी २६ गते सम्म संचालन भएको दादुरा रुवेला र पोलियो खुवाउने अभियानमा तुलसीपुर उपहानगरपालिकामा १४ हजार ३०८ अर्थात ९६ प्रतिशत बालबालिकाले दादुरा रुवेलाको खोप लगाएको उपहानगरको जन स्वास्थ्य महाशाखाले जनाएको छ ।

त्यसैगरी १६ हजार ६१८ जना बालबालिकाले पोलियो खाएको जन स्वास्थ्य महाशाखाका जन स्वास्थ्य निरिक्षक विमल केसीले बताए । दादुरा रुवेला खोप अभियान सफल गर्नको लागी प्रत्येक वडाले ९५ प्रतिशत लक्ष्य पुरा गर्नु पर्ने छ । तुलसीपुर उपमहानगरपालिकामा १४ हजार ९३६ लाई लगाउने लक्ष्य लिएको थियो । त्यसैगरी उपमहानगर भित्रका सबै वालवालिकाले खोप लगाएको वा नलगाएको बारे जानकारी लिनको लागी पनि स्वास्थ्यकर्मीहरु घरदैलो गरी सर्वेक्षण गर्ने समेत उनले बताए ।

दाङमा ७३ हजार ४ सय ८३ जना बालबालिकालाई दादुरा बिरुद्धको खोप लगाईने भएको छ । दाङका १० स्थानिय तह मध्य पहिलो चरणमा दाङको बंगलाचुली गाउँपालिका, तुलसीपुर उपहानगरपालिका, बबई, शान्तिनगर र दंगीशरण गाउँपालिकामा यो अभियान शुरु भएको थियो, भने दोस्रो चरणमा बिहीबार फागुन २९ गतेदेखि चैत ७ गतेसम्म खोप अभियान संचालन हुन लागेको छ । दोस्रो चरणमा घोराही उपमहानगरपालिका, लमही नगरपालिका, राप्ती गाउँपालिका, गढवा गाउँपालिका र राजपुर गाउँपालिकामा खोप अभियान संचालन हुन लागेको हो ।

दादुरा रुवेला विरुद्धको खोप बच्चा जन्मेको ९ महिनादेखि ५ वर्षमुनिका बालबालिकालाई लगाईन्छ, भने पोलियो खोप बच्चा जन्मेदेखि ५ वर्षसम्मका बालबालिकालाई खुवाईन्छ ।